كتب المجاهد عوض الجيد سليمان ود من الله الى الشهيد فضل الله عبدالمطلب الهادي (مكحل) رسالة عبرمن خلالها عن صداقة الخنادق والمعارك رغم بساطة المفردة ولكنها توثيق حي لما يدور في الميدان جاء فيها :
اخي الذي لم تلده امي كيف تحول من صديق لي الي شقيق كنت اعرفه معرفة عادية معرفة أصحاب بي اهلي الفي قريتهم حتي يوم 6/7/2023التقيت به في ود مدني السوق الكبير سلمت عليه:
وبادرته اخبارك وصحتك قال لي عافية . سألني عندك شنو هنا ؟ قلت ليه والله سمعت في استنفار وجينا كايسيين المعسكر قال لي الله أكبر
سألته له وانت عندك شنو ؟
قال لي انا جاي من المدرعات .
المزيد من المشاركات
قلت له يازول انت جادي ؟ قال لي اي والله مشيت التحق في المدرعات وقالوا لي ماف إلحاق قلت له وهسي فهمك شنو؟ قال لي ماشي الحلة قلت له تمشي معانا نشوف ناس مدني ديل .
وبالفعل مشينا مع بعض قالوا لينا لسه ما حددنا معسكر امشوا وتعالوا الأسبوع الجاي مشينا والاسبوع الجاي اتصل علي جينا مدني سجلنا مع بعض وانخرطنا في التدريب حتي 5/8/2023 .
كان اي زول يسألني منو بقول لي (اخوك وين ) ؟
حتي الذي عرفونا بالاسماء مفتكرين حلتنا واحدة .
وعندما حضرت البكاسي حقت الجهاز انسرقنا من المعسكر وركبنا معاهم الي ولايه النيل الأبيض كنانه وهناك قعدنا ٣يوم واكتمل المتحرك بقيادة الأمير عمرخوجلي وتحركنا الي جبل أولياء .
وبدأت صداقتنا تتحول خوة دم وصلنا جبل أولياء وظللنا هناك اكثر من اسبوع . وبدأت المعارك تشتد على اخواننا في المدرعات وحينها عرفنا انو وجهتنا المدرعات كبر الشهيد بصوت عالي وقال لي دي الدايرها انا وبدأت الرحلات الي المدرعات واصابنا القلق علي اخواننا الذين سبقونا وكنا كل ما اتينا الي المركب من اجل الذهاب الى المدرعات برجعونا حتي تناقشنا مع الأخ ابراهيم المنصوري والذي قال لنا . انتو حتمشوا مع شيخ قيس لانه قال كدة .
مشينا انا والشهيد الي شيخ قيس وكان حاضر اخونا الطاهر (الليلي)قلنا له يا شيخ قيس حمونا نركب قال لنا انا دايركم توازروني (تذهبوا برفقتي ) قلنا له نحن دارين نلحق اخوانا قال لنا كويس
وبدأت الرحلة الي المدرعات بي اللانش كنا على متنه ١١ مجاهد بعد مشقة ومعاناة وصلنا سلاح الذخيرة وكنا نخوض أشد أنواع المعارك .
و من المركب الي مسجد الذخيرة كانت ملابسنا مبللة وكانوا في حوجة لأفراد لإخلاء جرحى وقف الشهيد وسط المسجد وقال بصوت عالي نحن بنمشي بس ادونا سلاح . وقفت انا والشهيد (مجاهد )و اوكامبو والأخ عمر محمد عبده كان اخونا عمر الفاروق مصاب في رجليه الاثنين قام وهو يتوكأ علي عصاه واقتلع لنا اربع بنادق ودخلنا المدرعات .
ونواصل ثم ماذا هناك داخل حوش المدرعات .
