فوق راي
هناء إبراهيم
البرومو الرسمي لـ (أغدا ألقاك)…
أكتر حالة بتستلمك وتخليك عايش جوه (حارة الحالات) التي تزيد عن الألف حالة وتخلي قلبك يودي ويجيب وخيالك يكتب مليون سيناريو وبتتكلم مع نفسك أكتر من فاطمه تحرير وحنان جوطه وخابر عزو مجتمعات… هي لمن يكون عندك حاجة مهمة بكرة طوالي…
….
خط الترقب والانتظار…..
نتيجة … سفر … مشروع جديد.. مقابلة عمل…. فـ مابالك إذا الموضوع (موعد تأجل كثيراً) مع أهل قلبك ذات نبضو…
وفي رواية أخرى قلبك شخصياً…
أو كما جاء في كلمات فضل الله محمد وألحان محمد الأمين…
والأسماء هنا ماركة فن
(أشوفك بكرة في الموعد)..
فـ شنو؟!
تصور روعة المشهد …
الأغنية دي قدمت أحلى برومو لمسلسل التلاقي…
لحالة ما بنعرف نعبر عنها…
هو نفسو حاول يستوعب الموضوع أول وكرر أشوفك أشوفك كتير…كأنو بمهد ليك طريق الوصال الجاي ثم دخل في الموضوع
المزيد من المشاركات
الموسيقى كمان تمت الباقي جمال….
قال تصور روعة المشهد…
وقعد يتصور هو… ويحكي عن اللقاءات الـ أكلتها الظروف ويعتذر بي أنبل العبارات….
وكلنا طبعاً تصورنا روعة المشهد.. اي واحد حسب مقدراتو… واحدين تخيلو المكان في جبل مرة أو اذربيجان وواحدين ودوهم شارع النيل…
الخيال ذاتو يا جماعة خشم بيوت وإمكانيات
والله جد…
المهم الظروف لاوتو… لكن قرر يطاوع إرادة الحب…. والتمطر حب
لذلك غلبو الصبر…. وبقى يتكلم مع الأيام
(يا يوم بكرة ما تسرع تخفف لي نار وجدي)
البيت الذي استلفه ٨٨٪ من أهل الوجدان في مثل هذه المناسبات
يعني اذا بس قرروا يشيلوا من الناس ديل حق إيجار هذا البيت… القروش دي تشتري بلد وتلاتة شركات كبيرة
وهو حينئذ ما جاء يدو فاضية ولا جاء براهو…. معاه أشواقو وثمار الصبر ودعواتنا….
القصة إنهم خلونا في البرومو العمر دا كلو…. وعملوا المسلسل ومشوار التلاقي (برايفت)
و……….
وداعاً يا ظلام الهم على أبوابنا ما تعتب
ومرحب يا صباح الحب
لدواع في بالي
