فوق راي
هناء إبراهيم
ستارلنك
قبل كذا سنة حين كتبت (يقام المأتم بالواتساب) ضحكتو ساي وقلتو دا جن شديد حينئذ…
قوم يا الواقع تعال الآن بذلك المقال على ثلاثة مذاهب…
المذهب الأول وهو ما ذكرته في ذلك الوقت عن احتمالية أن تتحول الأفراح والأتراح من الواقع إلى المواقع (مواقع التواصل الإجتماعي) حيث يقام عزاء الرجال عبر الماسنجر وصيوان السيدات في قروب واتساب…
(ووواي يا سامية واااي)
يقول ليك عزاء النسوان في الواتساب.. ما تمشي ماسنجر الرجال
وقد حدث ذلك كثيراً تحت أمر الح.ر.ب والترحال والنزوح والجن.جويد والطرق ونار البعد والغربة…
حتى أنني سمعت احداهن في معترك لوم وتبرير تقول: يختي عمك عثمان ما سافرنا العزاء لأنو مات نازح
وعبد الرحمن خالي مات نازح وإقبال بت الزين ماتت نازحة… اي حدثت الوفاة بعيدا عن دار المرحوم وناسو… كان ضيف في جهة ما واهلو كل واحد في جهة لذلك فالعزاء بالهاتف إن وجدت شبكة… والحمد لله على رحمته ولطفه
…
المذهب الثاني… ديل الناس العملوا بكاء لمواقع التواصل نفسها حين اختفت بحكم انقطاع الشبكة وسجلت موت اسفيري…
غياب الإتصالات والإنترنت عن الكثير من المناطق بالشهور … فتخيل حال مدمني هذه المواقع قبل أن تتصور حال من لهم مصلحة وضروريات وأكل عيش مرتبط بالإتصالات والإنترنت…
علاج إدمان قاسي وإجباري…
تعاين للواحد يحنن…. التقول ماتن ليهو خمسطاشر أم…
والله جد…
يبقى مسكيييين… عاضي كلب شوق سعران
المزيد من المشاركات
المذهب الثالث وهو الماثل أمامكم في الصورة أعلاه..
صيوان للإتصال عبر القمر الصناعي
اتفرجتوا؟!
النسخة الأقدم من مقاهي الانترنت ديك..
النسخة القديمة كانوا عاملين ليها تحديث… النسخة الحديثة عاملين ليها (ترجيع)
صيوان وكراسي بلاستيك حمراء وستار لنك…
اتفرجتوا..؟!
دايرين نقول للراجل اشبك لينا… عبدو صلاح وعبدو مكنة قالوا ليهو الفاتحة…
حبوبة جيرانا مشت ال ستار لنك… جات راجعة قالت لي دي اخر مرة يا هناء ابراهيم… اتخيلي مشيت لقيت نفسي مترقبة الصينية والضلع…
وهسه شربنا الشاي…
أحدهم في مكالمة (لا لا الصيوان البعدو ياخ… الاول دا ناس الشبكة… العقد الصيوان التاني… الشارع ال جنب الورشة دا)…
اقول قولي هذا والله يلعنك يا حميدتي
و…..
الفاتحة فيني على ال انستا
لدواع في بالي
