فوق راي
هناء إبراهيم
توب النزوح باي باي… توب الفرح جاي جاي
أرادت الشركة أن تصنع مائة نسخة أو ألف نسخة من هذا الثوب ولكن أثناء كتابة الرقم (المكنة علقت في الصفر) فصار عدد غير محدود بأصفار لا تعد لكوكب كامل من النساء….
أعتقد ذلك..
التوب دا كتير كتير كتير ياخ…
والله جد..
نضال صاحبتي كان عندها توب زي دا قبل الحرب (عاجبها جداً شلبتو من بهجة أختها) ورغم إنو أذواقنا مختلفة تماماً لكن حين نزحت وقررت اشتري توب صلاة لقيتو في وشي (توب اكتر من انتهاكات الجنجويد)
على سبيل الشوق قمت باختياره كونه مماثل لثوب صديقتي
مسافة مشيت من بيتنا للسوق لقيت 17 لابسات التوب دا…
توب صارفنو صرف….
بعد فترة كدا مشينا الحلة…. وهناك معروف بتلفح توبك كتير والتوب جزء أساسي…
في حوشنا بس هناك ستة نسخ من هذا الثوب فما بالك بباقي الحلة..
التوب دا إذا وزعوا مع الحرب ما ح يكون بالكمية دي…
هنا انت معرض للنداء الكتير بسبب تشابه التياب
مشيرة؟! هي هناء إبراهيم قايلاك مشيرة
الغريبة لمن حققت لقيت مشيرة ما عندها توب زي دا لكن بتكون ذات مرة لبست نسخة منو
شخص آخر في شارع آخر يناديني حرم؟! ثم ينتبه فيقول هناء إبراهيم
توب حرم دا لميس بتها ذاتها بتلفحو..
ينادي حلوم… يتأكد لا لا هناء إبراهيم
لسبب ما الجميع بقولوا لي إسمي كامل
وهسه شربنا الشاي…
ثم أصبت بزهجة 16 برو ماكس من هذا الثوب
زهجت منو عديل كدا….
المزيد من المشاركات
قلبي قال لي ودي البحر…. لكن خفت يجي مع الموية
من منطلق البحث عن حلول قلت لعشوش بدلي لي… وقد كان
المشكلة إنك لفترة من الزمن ح ينادوك عشوش فهذا ثوبها
لأنه كما تعلم التياب محفوظة والمقامات
الحالة دي أنا كائن بيتوتي فما بالك إذا كنت حوامة زي فاطمه تحرير
والله جد…
نقطة التحول حين قمت بشراء ثوب آخر جديد…
الشفع سيروني عديل
قلت ليهم كبرتو الموضوع شديد السيرة دي وفروها لعرسي
جلال (ود شاهيناز وحسام) شافع عمرو 4 سنة قال لي الليلة من وين التوب دا
اتفرجتوا؟!
قلت اشتكي لحلوم بعد هي نفسها علقت على التوب كما فعل الجميع (قلت ليها تخيلي جلال قال لي الليلة من وين التوب دا)
قالت لي كلامو صاح… طلعتي عينا بي توبك الزي الـ….. داك
الله يسامحكم…
أمس لاقتني الصورة دي… اتذكرت الكلام دا كلو وضحكت…
بعد الحرب دي تنتهي إن شاء الله ما دايرين التوب دا معانا في دولة 24
التوب دا ينعدم…
اي واحدة تلقوا عندها التوب دا… خلوها تنزح تاني
أقول قولي هذا على سبيل الونسة والحكي
إذا عارفة ح اكتب عنو يوم كنت أخدت صورة ظااابطة لكن معليش لنفسي
و……..
إنصاف تغني
لدواع في بالي
