فوق راي
هناء إبراهيم
شوق اوفر دوز
تختلف الهموم ودرجة الشيب والفقد ولكن الشوق واحد…
معظم الناس دي جاها شيب الحرب…
والله جد…
الجنجويد شيبو بالشفع ذاتن
نحن شيبنا من الشوق والحنين والفقد…
مشتاقين لبيوتنا وشوارعنا وتفاصيلنا…
ما شوق ساي…
شوق كافر اكتر من الجوع
شوق بكاي ولا بتحنس…
شوق اكس لارج…
انت m ولابس شوق اكس لارج
شوق أكبر منك
أكبر من المسموح به…
نسبة شوق لم تصرح بها وزارة الصحة
شوق اوفر دوز
والله جد…
مشتاق تقيف للمواصلات جنب بيتكم
انت مشتاق للكمساري والزحمه والكلاكلة والميناء البري..
مشتاق لصوت سارة محمد عبد الله الفيهو طاقة وتفاؤل وسودان سمح
مشتاق لصينية بري وشارع المشتل و13 شرق النيل والشهداء والمحطة الوسطى والسوق العربي
مشتاقة تلفحي طرحتك تمشي لصاحبتك في بحري
مشتاق لعربتك النهبوها
للجبل والقطينة وانت ماشي النيل الأبيض وكردفان
مشتاق للجنينة ولتفاصيل شارع أبو جبيهة وكادقلي
مشتاق للعربية الكبيرة الـ كنت بتمشي بيها نيالا (بضائع ماشة بضائع جاية والأمن ثالثكما)
انت مشتاق ود مشتاقين
….
تشوف محل طعمية يسكك الشوق يوصلك محل الطعمية الـ كنت متعود تفطر منو
…
يلاقيك فيديو لشارع المطار… تسافر مشاعرك كلها وتجيك في نفس اللحظة مستفة فقد ودموع
المزيد من المشاركات
مناديل العالم ما يحلنك
والله جد…
….
مشتاق تضرب لي اصحابك تلاقيهم كلهم في نص الخرطوم
في شارع النيل
في عفراء
في عبيد ختم
تلاقيهم وتبل الشوق
…
مشتاق تمشي خميس وجمعة لي اهلك في الجزيرة… تشبع ونسة وتجي راجع ملان طاقة روح
.
مشتاق تمشي الأبيض في الخريف..
…
فاقد منظر أطفال المدارس في الشوارع وشكلة كنبة شكراً طلبة وما طلبة
…
مشتاق للجامعة وناس الجامعة
.
مشتاق لشغلك
..
للقهوة وشاي المغرب مع الجيران
…
الشجرة والزهور والورود وكل حاجة في بيتكم
…
سافرت… واشتغلت.. برسلوا ليك… بس برضو ما عارف مالك
انت عندك شوق اوفر دوز… وقلقان على بلدك
فـ اطمن… دا امتحان عظيم.. امسك في الصبر والدعوات واتفرج على جبر ربنا وعدله وكرمه
ربنا ح يكرمنا في بلدنا دي كرم عظيم إن شاء الله
اطمن… كل دا بمر والسودان بطيب قريب إن شاء
و……
طبعاً طبعاً (يشيلك شوق وسط عينين يوديك مقرن النيلين)
ويوديك حتات كتيرة خلاص
شوق 15 برو ماكس
لدواعٍ في بالي
* نقلاً عن صحيفة (دقايق)
