فوق راي
هناء إبراهيم
نعيمية مفخخة
العزومة هي أن يخبرك شخص أو ناس فلان ويقولوا ليك تعال احضر معانا مناسبة معينة لأنو حضورك يشرفنا ويمنحنا فرح إضافي..
او واحد صاحبك ساي يقول ليك ارح عازمك كذا….
او تعزم نفسك براك
اكتر حاجة اتعزموا ليها النازحين هي القهوة
والله جد…
البيوت دي دورت قهوة لمن البن قال اني استسلم
البن قال لينا انتو فاهمين غلط…. انا ما ذخيرة انا بن
البن يهتف الشاي ينحل والقهوة للثكنات
أعتقد ذلك….
الناس ماشين للنازحين الناس جايين من النازحين القهوة مدورة
القهوة مدورة اكتر من المعارك
انا هناء بتاعة هسه شربنا الشاي دي.. شربت قهوة في الحرب دي اكتر من نضال حسن الحاج
والله جد…
نسوان الحلة عازمات روحن عند فلانة الجات من الخرطوم أو مدني (ماشين نشرب الجبنة مع فلانة والمقصود الونسة طبعاً… الجبنة للتمويه
عن نفسي اكتر حاجة اتعزمت سمك (حذيفة يجيب السمك ويقول لينا عوك)
وهسه شربنا الشاي…
نجي لموضوعنا…. في عزومة تبدو من الخارج عزومة لكنها من الداخل فخ
والله جد..
كمين…
انت يا صديقي مشركيين ليك…
تأتيك العزومة على هيئة (عليك الله الليلة تعال أفطر معانا)
تمشي تفطر وتشرب الشاي في امان الله مطمن تب…
المزيد من المشاركات
في الونسة بكونوا بفتشوا لمناسبة عشان يطرحوا ليك السبب الخفي من العزومة
(خاصة لمن تكون نازح عاطل أو زول من ناس الحلة لكن معلم في حاجة معينة)
فلنفرض الموضوع (بُوهية)
طق… جات سيرة انصاف مدني تقوم ست البيت تقول ليهو بمناسبة إنصاف مدني.. أمس شوفت ليها مقطع من حفلة قديمة في نادي النيل.. الحفلة دي فيها واحدة لابسة توب اسود سمح لكن عاملة مكياج تقيل بوهية تقيلة (هنا طبعاً وصلت لقلب الموضوع كسر رقبة..)
كسر رقبة جابت سيرة البوهية ودخلت إنصاف مدني مناسبة بدون عداد..
هسه انصاف مدني سألتك؟!
تواصل (اتذكرت والله بالبوهية دي عندنا سراير دايرات بوهية)
ويطلع بالصدفة البوهيه جاهزة وكل لوازم البوهية جاهزية
تاني انت ما عندك طلعة… عندك طلاء
والله جد…
صاحبتك تقول ليك تعالي عاملين النعيمية البتحبيها…. تمشي ابتسامتك مبارياك تستمتعي بالنعيمية… بتشربي في الشاي تشوفيها جابت 15 دستة هدوم وطشتين وصابون ومشابك وجردل…
هنا يا عديل قالت ليك قومي اديني وش وشين
يا خلتك انتي وإحساسك واكيد ح تقومي تشاركي في مهرجان الهدوم دا…
الناس مأكلنك نعيمية
والله جد….
عندنا مرة اولادها خدومين في الحله لكن في البيت ما بشتغلوا… شهرين تشحد فيهم يجلدوا السراير… يقولو ليها سمح يا أمي ويزوغوا
قامت شركت ليهم… وزعت السراير في كم بيت وقالت ليهم بعد يجوكم اولادي اشحدوهم يجلدوا السرير دي…
وجلدوهن والله…
المهم يا جماعة الناس تنتبه… وعلى المعزومين أخذ الحيطة والحذر وتجهيز الوقت الكافي للمهام التي تأتي من ناحية العزومات….
الارتكاز دا اسمو سجم خشمك.. بختوك في حتة ضيقة… ما عندك خيار تعتذر
فـ اشتغل وراك شنو يعني
و……….
عازماه قهوة
لدواعٍ في بالي
* نقلاً عن صحيفة (دقايق)
